හෘදයාබාධයක් හේතුවෙන් අභාවප්‍රාප්ත වූ මීගමුව හිටපු නගරාධිපති හර්මන් බර්නාඩ් කුරේරා මහතාගේ දේහය 06 පස්වරුවේ මීගමුව මහා නගර සභා පරිශ්‍රය වෙත රැගෙන එන ලදී.
එහිදී මීගමුව මහා නගර සභාව වෙනුවෙන් සම්ප්‍රදායානුකූලව දේහය භාරගනු ලැබුවේ වත්මන් නගරාධිපති දුලිප් චාමර ප්‍රනාන්දු මහතා විසිනි. අනතුරුව නගරාධිපතිවරයාගේ ප්‍රධානත්වයෙන් දේහය මහා නගර සභා ගර්භයේ (චේම්බරයේ) ගෞරවාන්විතව තැන්පත් කෙරිණි.
එහිදී සමස්ත මහා නගර සභාව වෙනුවෙන් සිය ශෝකය පළ කළ නගරාධිපති දුලිප් චාමර ප්‍රනාන්දු මහතා, අභාවප්‍රාප්ත හිටපු නගරාධිපතිවරයා මීගමුව නගරයට ඉටුකළ අමිල සේවය සිහිපත් කරමින් කෙටි ගුණ කථනයක නිරත විය. අනතුරුව ඒ මහතා දේහයට පුෂ්පෝපහාර දක්වමින් සිය අවසන් ගෞරවය පුද කළේය.
මෙම අවස්ථාව සඳහා නාගරික කොමසාරිස් නුවණී සුදුසිංහ මහත්මිය ඇතුළු ආණ්ඩු පක්ෂයේ සහ විපක්ෂයේ නාගරික මන්ත්‍රීවරුන් සහ සේවක පිරිසක් ද සහභාගි වී සිටියහ
